طريقة عمل التورتة

**Admin** الأربعاء نوفمبر 12, 2008 8:04 am

[size=24]في الأول هتعملي كيكة إسفنجية عادية.. دي المقادير والطريقة بتاعتها
المقادير:
• 5 بيضات.
• 2/1 1كوب سكر ناعم.
• 2/1 1كوب سمن.
• 3 كوب دقيق.
• 1 معلقة صغيرة فانيليا.
• 1 معلقة صغيرة بيكنج بودر.
• 2 كوب كاكاو.
الطريقة
هاتي البيض واكسريه في إناء عميق وضيفي إليه السكر والفانيليا واضربيهم مع بعض 'بالمضرب الكربائهي' لمدة ربع ساعة أو لغاية ما تلاقي الخليط ده بقى عامل زي الكريمة...
بعد كده هاتي الدقيق والبيكنج بودر وضيفيهم لبعض ولو عايزة تعملي كيكة بالشيكولاتة ممكن إنك تضيفي إليهم 'الكاكاو'...
ضيفي الدقيق والبيكنج باودر بالتدريج إلى البيض والسكر وقلبيهم مع بعض كويس باستخدام معلقة خشب بس خدي بالك إن التقليب يكون بالراحة.
بعد كده هاتي صينية أو 'قالب كيك' وادهني القاع والجوانب بشوية سمنة ورشي رشة صغيرة من الدقيق علشان الكيكة ماتلزقش منك في الصينية وبعد كده صبي خليط الكيكة فيها....
شغلي الفرن لمدة 5 دقائق وبعد كده دخلي صينية الكيكة الفرن وخلي درجة الحرارة متوسطة وسيبيها لمدة 40 دقيقة أو لغاية ما تلاقي وشها أحمر....
ولو عايزة تتأكدي من إن الكيكة استوت من جوه يبقى ممكن إنك تجيبي سكينة نضيفة وتحطيها في وسط الكيكة، لو خرجت السكينة نضيفة زي ما هي يبقى كده الكيكة استوت من جوه، لكن لو خرجت وفيها أي حاجة يبقى الكيكة ماستوتش..
بعد ما تستوي الكيكة خرجيها من الفرن وسيبيها شوية لغاية ما تبرد علشان تقدري إنك تنقليها في صينية تانية مستديرة وخدي بالك وإنتِ بتنقليها إنك تحطيها على وشها بحيث تبقى الناحية اللي تحت فوق واللي فوق تحت.
طريقة تزيين وحشو تورتة الكريمة
المقادير:
• زيدة.
• لبن.
• مربى.
• علبة كمبوت أناناس.
• علبة بودرة كريم شانتيه.
• جوزة الهند مبشورة.
• تشكيلة مكسرات مفرومة 'لوز وبندق وجوز وفستق'
• كريز.
• قمع لتزويق التورتة.
الطريقة:
طلعي الزبدة من التلاجة وسيبيها لمدة نصف ساعة علشان لما تيجي تستعمليها تلاقيها سايحة شوية...
هاتي طبق عميق وحطي فيه اللبن البارد وبعد كده ضيفي إليه علبة بودرة 'الكريم شانتيه' واضربيهم مع بعض كويس بالمضرب الكهربائي، لمدة عشر دقائق وبعد كده حطي الكريم شانتيه في الفريزر...
هاتي الكيكة وقسميها باستخدام سكينة الحلويات إلى طبقتين، وخدي الطبقة الأولى وحطيها على صينية تانية ورشي عليها ماء الكمبوت..
وعلى سطح النصف التاني من الكيكة هتفردي طبقة من الزبدة
وبعد كده طبقة مربى 'أي نوع مربى عندك' بعد كده ضمي الجزأين على بعض.
هاتي الكريم شانتيه وغطي الكيكة كلها بيه باستخدام ضهر المعلقة... وهاتي القمع وحطي فيه كريم شانتيه وزوقي الأطراف، وعلى فكرة ممكن إنك تحطي على الجوانب جوز الهند والمكسرات المفرومة اللي عندك.
بعد كده هاتي أي نوع فاكهة عندك 'فراولة أو تفاح' وقطعيهم إلى شرائح أو قطع الأناناس اللي موجودة عندك والكريز وزوقي سطح التورتة بالشكل اللي إنتِ بتحبيه، بعد كده حطيها في التلاجة لمدة نص ساعة.. وبالهنا والشفا.
طريقة تزيين وحشو تورتة الشيكولاتة
المقادير:
• 200 جرام شيكولاتة خام.
• نصف كيلو لبن حليب دسم.
• فنجان صغير مية سخنة.
• 2 معلقة فانيليا.
• تشكيلة مكسرات مفرومة 'لوز وبندق وجوز وفستق'
الطريقة :
هاتي الكيكة وقسميها إلى نصفين، بعد كده هاتي حلة صغيرة وحطي فيها الشيكولاتة وحطي الحلة الصغيرة في حلة أكبر منها فيها مية مغلية وسيبيها على النار لمدة 5 دقائق أو لغاية ما تلاقي الشيكولاتة ساحت داخل الحلة.. بعد كده تضيفي إليها اللبن وسييبها على نار هادية لمدة خمس دقائق كمان مع التقليب المستمر.

بعد انتهاء الخمس دقائق شيليها من على النار وضيفي إليها فنجان المية السخنة والفانيليا، بعد كده زوقي التورتة من الداخل والخارج بالشيكولاتة وممكن إنك تضيفي إليها شوية مكسرات مفرومة، وبالهنا والشفا.
[/size]